لو إني خلقت أنثى

من على خزانتي

لو إني خلقت أنثى، كان انا وحدة من ٣ امكانيات :

١. متجوزة عمري ٢٤ عندي بنت وحامل بالثانية، بشتغل معلمة عربي وبعمل بالماستر بعد مزوجي المتحضر شجعني ع الخطوة خاصة انه عندي كثير وقت غير شغل الدار والطبيخ والبنات وشغلي بالمدرسة. نصحت ١٠ كيلو من اول متزوجت، وحاسة حالي عمري ٤٠ ، بطل في اشي مهم بحياتي.. يضرب كل العالم، المهم بناتي حبيباتي مينقصش عليهن اشي.

٢. لساتني بنت عمري ٢٤ سنة شبه "معنسة" بعينين ال

مجتمع او فيي مشكلة عشان هيك لسا محدا "اخذني" ، بشتغل معلمة عربي وساكنة بالبلد صاحباتي كلهن اتجوزن وامي مجننتني بدها البس ع راسي...مشتهية وينتا الاقي عريس واخلص من نق امي ووجه ابوي، ابوي صرله اكم شهر مش حاكي معي .. شو اعملتله ؟ بحب ولاد اخوتي كثير ولاي شو جاي ع بالي اجيب بنت... بس من زمان مطلعتش ع محل. عنجد جاي ع بالي اطلع افرفش اخلص من حكي الناس وعينيهم. مخنوقة.

٣. قاتلت اهلي عشان اطلع اتعلم محاماة بالمدينة ورحنا منتلحم انا واهلي تني عرفت اوخد سكن بالجامعة ومأسافرش 3 ساعات كل يوم، وطبعا وافقوا بس بحجة الشغل. كنت حذرة اشوف شباب بس بالجامعة لكن شوي شوي صرت اشوف صحابي برة بس دايما خايفة يوصل خبر لأهلي. كل شهر وهوي جاييني عريس وكل الحجج فرطوا ... وابوي صار يشك انه مالي اشي، انه يعني ليش بدهاش؟ عاملة اشي؟، عمري ٢٤ وضليتني بالمدينة بججة الماستر اهلي عارضوا الفكرة بشدة ووقفوا كلياتهم ضد تعليمي... خلص لازم ارجع استقز وابز ولاد... ابوي قلي ياها بصراحة اذا برجعش بعد الماستر رح يتاكد انه مالي اشي.. وسيعتها يا ويلي!.. الوقت عم يمرق.. وكل متّك الساعة بحس السكينة صارت اقرب ع رقبتي.
...

بس انا خلقت ذكر .......مش لأني بدي أكون ذكر أو لأني اجتهدت كثيييير وصرت ذكر... لأ جيت هيك بالشنص، وكان يمكن مجرد x يجي محل Y وتصير حياتي أصعب بأضعاف.. وكان ممكن تكون حياتي وحدة من هدول الثلاث احتمالات.. 

صح احنا الذكور مخلقناش اناث، وممرقناش ومش رح نمرق بكل هالمعاناة بس لو بدنا...؟ منقدر نحس ! 

تيجوا نحس؟؟

Tweet