 |
| إم سامر، أُمنا |
معظمنا في بيناتنا شغلات متشابهة منفيق الصبح منشرب قهوتنا ومنطلع ع
الشغل او ع التعليم منروّح منشوف اهالينا وصحابنا ومنشاركهم تفاصيلنا اليومية،
منحضر تلفزيون.. منتصفح الانترنت... منكزدر منتمشى.. منمارس هواياتنا وفعالياتنا
اليومية.. منوكل مندرس منفلس تقريبا براحتنا.
اسا ركز معي شوي.
تخيّل كل هاي التفاصيل فجأة تسرقها كلياتها جيبات الجيش من حياتك، يقتحموا الجنود بشراسة بيتكم ويوخذوك من كنف عيلتك وحبايبك ومن الحضن لكبير الي بعيون امك.
ببلش الاعتقال بيوم واحد بتمدد لثلاث ايام.. بقطع الشهر وانت عم تتعرض للتعذيب ١٩ساعة باليوم ! مندون ميتم توجيه اي تهمة لالك وبلا متتقدم للمحاكمة وبلا متفهم اصلا انت ليش معتقل. الوقت بيمضي وانت شوي شوي بتفهم شو يعني اعتقال اداري تعسفي وانه في زيك ٣٠٠ سجين بالسجون الاسرائيلية. بتقرر تصبر شوي وبتمرق الاشهر ثقيلة بلا لتفهم انت اصلا وينتا رح تتحرر اذا اصلا رح تتحرر.
بتقرر تحتج لانه بنفعش هيك خاصة انك عم تتعرض للتعذيب بالسجن.. انت صابر اه بس اهلك خسروا كل حياتهم بسبب ظلم المحتل، بتقرر تضرب عن الطعام.. بتبلش فكرة، بتتحول ليوم صعب من الاضراب، بتكونش متخيل انه اضرابك رح يوصل ل ١٠ ايام ! بس اضرابك بيقطع ال ٢٠ يوم.. ال ٣٠ ال 40 حياتك بخطر بس ماحدا سامعك.
الدقيقة بتمرق ثقيلة جدا ومجروحة... انت عم تتعذب، بس اصرارك على العدل ونصرة الحق اقوى من اي اشي ثاني، اهلك عم يتعذبوا معك وهادا الي كاسرك. بالليل اذا نمت بتكونش عارف اذا رح تصحى ثاني يوم الصبح بس بطلت مفرقة معك كثير...
اضرابك عن الطعام بيوصل ل ٢٠٠ يوم مش حاسس ولا بعضو من اعضاء جسمك! الاطباء بقولوا انه قلبك ممكن يوقف باي لحظة. واصلا مش فاهمين كيف بعدك عايش! العالم الي اغلبه مسمعش عنك، مش ممكن يصدق انه في انسان زيك على قيد الحياة. ببساطة لأنه التاريخ مكنلوش قلب يسجل حدا بجبروتك.
وانت... كمان مش عارف كيف بعدك لحد اسا عايش، بطلت قادر تفهم اشي او تحس باشي بس عارف انك على بعد شبر من الموت وبتملكك شعور عميق بينهش قلبك او ما تبقى منه بسبب تخاذل أبناء شعبك وتجاهل العالم لقضيتك: قضية الفلسطينيين
سامر العيساوي الاسير الفلسطيني المضرب عن الطعام من٢٠٠ يوم في السجون الاسرائيلية مع اعادة اعتقاله بعد تحريره بصفقة تبادل أسرى عم يمرق بشي شبيه. ابدا محاولتش اني اشعر مكانه، لانه انا متأكد انه حتى سامر نفسه غير قادر على وصف هاي المرحلة المستحيلة الي بيمرق فيها.
بس حاولت احس لوهلة كيف ممكن يكون شعوري لو انا مكان سامر عم بمرق بهادا الاشي الجبار، وشعبي مش سامع صرختي.
حسيت\ي؟
اطلع\ي من ورا شاشتك، محلك بالشارع.
ليست هناك تعليقات:
إرسال تعليق