بيدور الحديث بالأيام الأخيرة عن وقفات احتجاجية في العالم ككل ضد التحرّش الجنسي في مصر وتحديداً التحرّش بالمتظاهرات
المصريات. صفحة انتفاضة المرأة في العالم العربي على مواقع التواصل الاجتماعية دعت
لهاي لتظاهرة على ما يبدو بنيّة طيبة بهدف الضغط على النظام المصري ليعالج هاي
القضيّة أو حتى "يجتثها". بفلسطين رح يكونوا وقفتين الأولى أمام السفارة
المصرية في تل أبيب، والثانية في دوار الساعة في يافا، هادا إضافةً لعشرات
التظاهرات في العالم .. في العالم ! شوفوا سخرية القدر.. ضد التحرّش الجنسي بمصر!
محدا بختلف على إنه قضية التحرّش الجنسي هيّ قضية مهمة جداً بسبب
تأثيرها الرهيب على حياة كثير من النّساء وكمان الرجال في عالمنا العربي عموماً
وفي مصر تحديداً، المسّ بالأمان.. بالخصوصية ، بملكية الشخص لجسده وحتى بحقّه
بالحياة..هوي أمر في قمة الوحشية ومن الضروري العمل على محاربة هاي الظاهرة بقوة. بس
كيف؟
عم نحكي عن ظاهرة مجتمعية في غاية الخطورة، معالجة هاي القضيّة من
الضرورة يكون في داخل هادا المجتمع من خلال القانون والأطر التشريعية يلي المفروض تنص
على محاربة هاي الظاهرة ومعاقبة المجرمين، وكمان من خلال الجهات التنفيذية
المسؤولة عن حماية المواطنين مثل الشرطة الي المفروض توخد دورها كاملا في هادا
الموضوع، بالإضافة إلى مؤسسات العمل المدني والمؤسسات النسوية الي المفروض تشتغل
على انها ترفع نسبة الوعي لدى المواطنين لحجم خطورة هاي الظاهرة وضرورة التبليغ عن
المتحرّشين ومعاقبتهم بالأطر القانونية.
بس ياجماعة مش من برّة! قضية التحرّش الجنسي في مصر بتنحلش من
بريطانيا، ولا من أميركا.. ولا من إسرائيل! أكثر إشي مثير للسخرية بهادا الموضوع
والتقزز بنفس الوقت هوي التظاهرة يلي مخططينلها نسويات إسرائيليات مع الأسف
بمشاركة بعض الفلسطينيات أمام السفارة المصرية في إسرائيل... مش فاهم كيف منعطي
الفرصة لهادا المستعمر الكولونيالي المتحضّر والمتنوّر يلي مستمر في ذبح شعبنا
وتشريده ييجي ينطّر علينا ويحكيلنا كيف لازم نعالج قضايانا العربية الداخليّة.
بعرف إنه الموضوع النسوي كثييير سكسي بس بلا مننجر ورا هالموضوع
بهالسرعة لأنه علاج هاي القضية هوي من داخل مصر ومش من خارجها والدعوة للتظاهرات في
العالم هيي بمثابة دعوة للتدخّل في شؤون مصر الداخلية وللتنظير علينا، بدناش تنظير
من الأميركان الي قتلوا مليون عراقي، بدناش تنظير من الفرنساوية يلي قمعونا
واحتلونا لعقود.. وبدناش تنظير من الإسرائيلية المستمرين في قمع شعبنا الفلسطيني
واضطهاده.
بس ممكن مثلاً نتضامن احنا كعرب مع نساءنا المصريات والرجال يلي مرقوا
بحادث تحرّش.. من خلال تظاهرة في دوار الساعة في يافا مثلاً زي كيف قرروا الناشطات
الفلسطينيات يعملوا يوم الثلاثا الساعة 17:00 في يافا. من حق النساء الفلسطينيات
يتضامنوا مع النساء المصريات، لأننا بالضرورة شعب واحد وقلب عربي نابض واحد. بس
كمان في مش لازم تكون هاي الوقفة الاحتجاجية في إطار دعوة صفحة انتفاضة المرأة في
العالم العربي للتظاهر أمام السفارات للأسباب الي ذكرتها.
ليست هناك تعليقات:
إرسال تعليق